Tair ar ddeg o gymdeithasau tai Cymru wedi eu rhoi ar restr fer yng Ngwobrau Arfer Da Cenedlaethol TPAS Cymru

Enwebwyd tair ar ddeg o gymdeithasau tai yn y gwobrau eleni, sy’n cael eu cynnal ar 5 Gorffennaf yng Nghaerdydd, gan ddathlu’r gwaith y mae cymdeithasau tai a thenantiaid yn eu gwneud yn eu sefydliadau a’u cymunedau.

Mae’r rhai a enwebwyd yn cynnwys ClwydAlyn, Tai Tarian ac Adra sydd oll wedi cael eu rhoi ar y rhestr fer am y wobr Rhaglen Gefnogi/Cynghori Preswylwyr sy’n edrych ar y ffordd y mae landlordiaid cymdeithasol wedi bod yn buddsoddi mewn tenantiaid a chymunedau a’u cefnogi, a sut y mae wedi helpu preswylwyr i oresgyn heriau a gwella eu bywydau.

Enwebwyd Tai Tarian i gydnabod gwaith caled ei dimau cynhwysiant ariannol a chredyd cynhwysol yn ystod yr argyfwng costau byw. Mae’r tîm wedi helpu gyda 20 o gyfeiriadau ychwanegol y mis oherwydd y cynnydd mewn costau, gan gynnig awgrymiadau a chyngor cyson ar y cyfryngau cymdeithasol, cefnogi 2,132 o geisiadau budd-dal llwyddiannus, helpu i sicrhau bod 605 o dalebau banciau bwyd yn cael eu rhoi - a mwy.

Dewiswyd Adra, yn y cyfamser, i gydnabod ei chynllun sgiliau a chyflogaeth, Academi Adra, sy’n helpu pobl sy’n byw mewn cymunedau lleol i ddatblygu eu sgiliau a dod o hyd i waith. Mae’r cynllun yn cynnig profiad gwaith, lleoliadau, prentisiaethau, hyfforddiaethau, gwirfoddoli a mwy.

Rhoddwyd Cymoedd i’r Arfordir ar y rhestr fer yn y categori Gwobr Cyfathrebu â Chwsmeriaid a Phreswylwyr diolch i’w fenter Pop Up, sy’n annog ymgysylltu cymunedol a chyfathrebu wyneb yn wyneb â thenantiaid ar draws Pen-y-bont ar Ogwr. Mae wedi cael ei enwebu hefyd yn y Wobr Cymunedau yn Cefnogi Cymunedau diolch i’w bartneriaeth gyda Chlwb Ieuenctid Windmill, sy’n ceisio ymgysylltu â phobl ifanc mewn cymunedau.

Enwebwyd tenant Stori Maria ar gyfer Tenant y Flwyddyn, diolch i’w hymrwymiad i wella gwasanaethau’r gymdeithas, eu cyfleu ac ymgysylltu â thenantiaid.

Rhoddwyd tenant Caredig, Jo Ashford, hefyd ar y rhestr fer am wobr Tenant y Flwyddyn am ei hymwneud, ei hymroddiad a’i chyfraniad at y gymuned am dros 10 mlynedd a chael effaith gadarnhaol ar fywydau pobl eraill.

Rhoddwyd Hafod ar y rhestr fer yn y categori Cynnwys Tenantiaid wrth Ffurfio neu Graffu ar Wasanaethau, am ei dulliau sy’n gadael i denantiaid graffu a dylanwadu ar ei gwasanaethau, a rhoi barn werthfawr.

Enwebwyd Cartrefi Melin yn y categori Cynnwys Tenantiaid wrth Ffurfio Gwasanaethau am ei gynllun Gwrando Gweithredu a Dysgu, sy’n dwyn at ei gilydd y gwaith y mae gwahanol dimau Melin yn ei wneud gyda phreswylwyr, yn dynodi tueddiadau, casglu pryderon preswylwyr, cwynion, canmoliaeth ac yn gweithio i wneud gwelliannau i’w wasanaethau.

Rhoddwyd Tai Calon ar y rhestr fer am y categori Llais Tenantiaid, am ei ymrwymiad i wella bodlonrwydd cwsmeriaid a gwella’r ffordd y mae’n gweithio gyda thenantiaid ac yn gwrando arnyn nhw. Yn ystod y 18 mis diwethaf mae’r gymdeithas dai wedi bod yn ymgysylltu’n weithredol â thenantiaid i sicrhau bod eu lleisiau’n cael eu clywed a’u bod yn gallu cael mwy o ran yn ei gwasanaethau.

Rhoddwyd Newydd hefyd ar y rhestr fer yn y categori Llais Tenantiaid am ei strategaeth ddylanwadu tenantiaid Pobl yn Ganolog, sy’n rhoi technegau dylanwadu i denantiaid i’w galluogi i gyfrannu yn y gymuned a gwella gwasanaethau Newydd.

Mae cyfleoedd dylanwadu Newydd yn cynnig dewisiadau i denantiaid sy’n gynhwysol, hyblyg, hygyrch, ac yn annog tenantiaid i gymryd rhan.

Rhoddwyd Newport City Homes ar y rhestr fer yn y categori Cyfathrebu gyda Thenantiaid a Phreswylwyr i gydnabod ei ymateb i argyfwng system wresogi Duffryn yn gynharach eleni. Ym mis Chwefror, oherwydd bod rhwydwaith cynhesu ardal gyda biomas yn gollwng yn Duffryn amharwyd yn sylweddol ar bron i 1,000 o gartrefi. Wrth ymateb sefydlodd Newport City Homes dîm ymateb i argyfwng i gefnogi’r preswylwyr; rhoi’r newyddion diweddaraf i’r gymuned dros y ffôn, ar y cyfryngau cymdeithasol, gwefannau a thaflenni; sicrhau bod pawb yn gwybod sut i gael mynediad at gefnogaeth a chyfleusterau ar unwaith; a llunio perthynas gadarnhaol trwy’r gymuned gyfan.

Rhoddwyd Cymdeithas Tai Sir Fynwy ar y rhestr fer ar gyfer y Wobr Cymunedau yn Cefnogi Cymunedau, diolch i’w Grŵp cymunedol Monmouth Motivators. Mae’r preswylwyr yma’n cyfarfod yn fisol ac yn ymroddedig i wneud eu cymuned yn lle gwell i fyw. Er mwyn cefnogi’r gymuned maent wedi trefnu nifer o brosiectau a digwyddiadau yn canolbwyntio ar iechyd a llesiant, digwyddiadau plant ac adloniant, a hefyd wedi cyfeirio pobl sydd angen help ariannol a lles ar unwaith at dîm cynhwysiant Tai Sir Fynwy.

Enwebwyd Merthyr Valleys Homes hefyd yn y categori Cymunedau’n Helpu Cymunedau am ei grŵp tenantiaid y ‘Greenwood Golden Oldies’; ac mae’r cynrychiolydd ar y corff democrataidd a’r preswyliwr Nigel Phillips Gunter wedi cael ei ddewis yn y categori Tenant y Flwyddyn.